ވިޔަފާރިއެއް އުފެދި ކުރިއަރަމުންދާއިރު، ދިމާވާ އެންމެ ބޮޑު އެއް ނުރައްކަލަކީ ކުރިން ލަފާނުކުރެވޭ ހާދިސާތަކާއި ހާލަތްތަކަށް، އެހެން ގޮތަކަށް ބުނާނަމަ “ރިސްކަށް” ހަރުދަނާ ސްޓްރެޓެޖީއެއް ނެތުމެވެ. ނަތީޖާއަކަށް ވެގެންދަނީ ކުރިން ދިމާވެދާނެ ކަމަށް ލަފާކުރެވިފައިނުވާ އަދި ހިސާބުކުރެވިފައިނުވާ ގެއްލުންތަކާއި ކުއްލިގޮތަކަށް ކުރިމަތިލާނެްޖެހުމެވެ.
ރިސްކް މެނޭޖްމަންޓްގެ މައިގަނޑު އެއް ބޭނުމަކީ ރިސްކްތައް ދެނެގަނެ، ރައްކާތެރިކަމުގެ ފިޔަވަޅުތައް އެޅުމެވެ. މަޤްޞަދަކީ ވިޔަފާރިން ދުރާލާ އަމަލުކުރާކަން ކަށަވަރުކޮށް، ލިބިދާނެ ގެއްލުންތައް ވީހާވެސް ކުޑަކުރުމެވެ.
ރިސްކަކީ ހުރިހާ ފަހަރެއްގައި ގެއްލުންކަމުގައިވެސް ނުވެދާނެއެވެ. އެގޮތުން ރިސްކު މެނޭޖްމަންޓަކީ ވިޔަފާރިއަށް އިތުރު ކުރިއެރުން ހޯދައިދީ، ކުންފުނި އިތުރަށް ވަރުގަދަ ކުރުމަށް ނަގަންޖެހޭ ރިސްކުތައް ކަނޑައެޅުމުގައި އެހީތެރިވެދޭ އެއްޗެވެ. މިދެންނެވި ފަދަ ރިސްކުތައް ނަގައި، އޮޕްޓިމައިޒްކޮށް، ނޭދެވޭ ގެއްލުންތަކަށް ހިސާބުކުރުމުން، ކުންފުނި އިތުރަށް ތަނަވަސްކޮށްދީ އަދި ދެމެހެއްޓެނިވި ތަރައްޤީއެއް ކުންފުންޏަށް ހޯދައިދެވެއެވެ.
ރިސްކު މެނޭޖްމަންޓްގެ އެހީގައި ކުންފުނިން ނަގަން ތައްޔާރަށް އޮތް ރިސްކު ނުވަތަ ރިސްކު ނެގުމުގެ ޤާބިލްކަން ސާފުކޮށް ދެނެގަނެވި، ވަޅުގަނޑުތަކުން ސަލާމަތްވުމަށް މަގުޗާޓެއް އެކުލަވާލައި، މަސައްކަތުގެ މާހައުލުގެ ސަލާމަތާއި ރައްކާތެރިކަން އަދި ގަވާއިދުތަކަށް އަމަލުކުރާވަރު ކަށަވަރުކޮށްގެން އުންމީދީ އުޖާލާ މުސްތަޤުބަލަކަށް ކުންފުނި ތައްޔާރުކޮށްދެއެވެ.
ހަރުދަނާ ރިސްކް މެނޭޖްމަންޓަކުން ލިބިދޭ އިތުރު ފައިދާތަކުގެ ތެރޭގައި:
1) ގާނޫނީގޮތުން ބަދަލުދޭން ޖެހޭފަދަ ގެއްލުންތައް ކުޑަކުރެއެވެ. މާލީ ގެއްލުމާއި ކޮލެޓަރަލް ޑެމޭޖް ހުއްޓުވޭނީ ޕްލޭނެއް އެކުލަވާލާފައި އޮތުމާއި އެ ޕްލޭނެއް ތަންފީޒު ކުރާނެ ގޮތް އެކަށީގެންވާ ފަރާތްތަކަށް އެނގިއްޖެނަމައެވެ..
2) ކުންފުނީގެ ނުއުފުލޭ މުދަލާއި އިތުރު އެސެޓްތައް ރައްކާތެރިކުރެވިގެންދެއެވެ. އަދި މުދާ ވަގަށް ނެގުމާއި، އެތެރޭގެ ފްރޯޑް ހިނގުމުގެ ފުރުސަތު ހަނިކޮށްދެއެވެ.
3) ވިޔަފާރި އެކަށީގެންވާ ގޮތެއްގައި އިންޝުއަރެންސް ކުރެވިފައިވާކަން ކަށަވަރުކޮށްދެއެވެ. ކުންފުނީގެއިންޝުއަރެންސް ކުރަންޖެހޭ ބައިތައް ކަނޑައެޅުމަށްޓަކައި އެންމެ ބޮޑު ނުރައްކާ ހުރި ދިމާތައް ރިސްކު މެނޭޖްމަންޓްގެ އެހީގައި ދެނެގަނެވެއެވެ. މިގޮތުން މިފަދަ ރިސްކުތައް ހުރި ކުންފުނީގެ މުދާތައް ނުވަތަ އިންޝުއަ ކުރަންވީ ބައިތައް ކަނޑައެޅި އިންޝުއަ ކުރުމަށް މަގުފަހިކޮށްދެއެވެ.
4) ކޯޕަރޭޓް ސޯޝަލް ރެސްޕޮންސިބިލިޓީ ވަރުގަދަކޮށްދެއެވެ. ހަރުދަނާ ރިސްކު މެނޭޖްމަންޓް ޕޮލިސީ އެއް ކުންފުނީގައި އޮތުމީ ކުންފުނީގެ ތިމާވެށީގެ އަދި އިޖްތިމާޢީ ސްޓޭންޑް އިތުރަށް ވަރުގަދަކޮށްދީ މުޖްތަމަޢުގައި ކުންފުންޏާއި ބެހޭގޮތުން ރަނގަޅު އިމޭޖެއް އުފައްދައިދޭކަމެކެވެ.
2008 ވަނަ އަހަރު މުޅި ދުނިޔެއަށް ދިމާވި މާލީ ކާރިސާ އަދި ކޯވިޑް19 ރޯގާއިން ވިޔަފާރިތަކަށް ދިމާވި ގޮންޖެހުންތައް ވަރަށްވެސް ބޮޑެވެ. ގިނަ ވިޔަފާރިތަކަށް ފޫނުބުއްދޭ ވަރުގެ ގެއްލުންތައް ތަހައްމަލުކުރަން ޖެހުނުއިރު ބައެއް ވިޔަފާރިތައް ބަނގުރޫޓުވުމުގެ ހިތާމައާއިވެސް ކުރިމަތިވިއެވެ. މިފިލާވަޅުތަކުގެ އަލީގައި ގިނަ ވިޔަފާރިތަކުން ފަހަކަށްއައިސް އަންނަނީ ރިސްކު މެނޭޖްމެންޓް އުސޫލްތައް ހަރުދަނާކުރުމަށް މާލީގޮތުންނާއި އެހެނިހެން ގޮތްގޮތުން މަސައްކަތްކުރަމުންނެވެ.
